Sebastian Vettel tar-Red Bull iddomina l-ewwel provi għall-Grand Prix tal-Ungerija wara li rreġistra l-aħjar ħin fiż-żewġ sessjonijiet. Illum is-sewieq Ġermaniż se jkun qiegħed jipprova jirbaħ il-Pole Position għar-raba’ darba konsekuttiva u s-seba’ wieħed tiegħu tal-istaġun.

Sieħeb Vettel fit-tim Red Bull, Mark Webber, kien it-tieni l-iktar veloċi fis-sessjoni ta’ filgħodu iżda f’dik ta’filgħaxija kien l-Ispanjol tal-Ferrari, Fernando Alonso, li spiċċa t-tieni.

Ta’ min jirrimarka li s-sewwieq l-ieħor tal-Ferrari, Felipe Massa, irritorna fit-track li weġġa’ gravi fih sena ilu. Iżda l-Brażiljan jidher li jinsab konċentrat meta rreġistra r-raba’ l-aħjar ħin.

Red Bull bdew għaxra mill-11-il tiġrija ta’ dan l-istaġun mill-ewwel post tal-grid iżda naqsu li japprofittaw u jdawru dan il-vantaġġ f’suċċess matul it-tiġrijiet. Vettel rebaħ żewġ tiġrijiet u Webber tlieta, iżda l-McLaren qegħdin fl-ewwel post taż-żewġ kampjonati tal-Formula Wieħed għalkemm fil-provi uffiċjali u fit-tiġrija ta’ għada mistennija taqtiegħa oħra bħal dik ta’ġimgħa ilu fil-Ġermanja bejn ir-Red Bull u l-Ferrari.

TV – Il-provi ta’ kwalifikazzjoni tal-lum se jintwerew dirett fis-2.00 p.m. fuq Rai2 u Go Sports