Kultant jiġini għax naħseb li ż-żgħażagħ Maltin huma l-aktar fer­­ħanin fost iż-żgħażagħ tad-din­ja kollha! Jidher li ma jonqoshom xejn. Ix-xogħol jiġi u jtellaq magħhom u jsi­buh wara kull liwja, opportunitajiet f’kull qasam hawn bl-abbundanza, fil-pajjiż te­żis­ti se­renità u trankwillità kważi ċimiterjali u l-flus issibhom f’kull xaqq u konsentura. Problemi ta’ xejn. Ħaj­ja idilika ta’ kuntentezza u affluwenza bla qies jew il­ġiem. Dawn iż-żgħażagħ għan­d­­hom għaqda u armo­nija anġelika bejniethom. Il-knejjes ma jesgħuhomx u don­nu Paceville qed imajna għax l-istil ta’ ħajjithom sar aktar matur, responsabbli, din­jituż, waqt li qiegħda tin­għata attenzjoni b’kull reqqa dwar is-saħħa!

Mhux li kien hekk!

Mhux li dan kollu mhux ħolma fiergħa!

Nagħli għax ilni li fhimt l-istrateġija li qisha bizzilla ta’ tifsiliet diversi, sbieħ u att­raenti kieku mhux għax l-għajnejn jiċċassaw fuqha. In­sejħilha l-bizzilla tal-is­kor­pjun. Arseniku. Velenu. Suwiċidju ta’ qajl qajl. Qtil vo­lontarju daqskemm involontarju.

Ħasra kbira li, bla ma niġ­ġeneralizza, għax hawn ħafna tajjeb ukoll fost l-element żagħżugħ ta’ pajjiżna, bosta huma dawk ta’ età tenera, f’dik li hi adolexxenza suppost sabiħa u enerġetika, li l-iskorpjuni qegħdin jirrovinawlhom ħajjithom, ikissru s-sbuħija ta’ ħajja sana, imew­tu l-istess ċelebrazzjoni tal-ħajja fl-isbaħ staġun tagħ­ha – ir-rebbiegħa.

Jekk trid tkisser pajjiż farrak is-sinsla tiegħu – iż-żgħa­żagħ.

Għidilhom liż-żgħażagħ, li kollox huwa leċitu, li x-xorb iqanqlek, li d-droga teċ­i­tak, turik il-verità, tgħall­mek bi ġmiel u lwien, li ma tgħamillek xejn ħażin, anzi tissodisfak. Ejja man ħu naq­ra!!

Billi nesperimentaw ftit!? L-ewwel pass l-itqal. Wara, kollox ward u żahar. Kollox stilel u xmux u qmajjar jit­tewbu mad-duħħan tal-eklissi l-ġdida waqt li l-baħar isab­bat f’widnejn imtarrxin u ku­luri jleħħu man-nifs u x-xorb. U billi tħallat ftit minn din ma’ dik tas-soltu u tixrob fuqhom? Tal-ġenn man!

Stħajjil! Ħarbien mir-real­tà sewda ta’ Malta marida. Titjir fl-ajru lejn qċaċet ġodda, fl-immensità tal-beraħ għax hawn m’hawnx ħobż, hawn biss pilloli u trab u barunijiet u jottijiet u flus id-demm, flus il-mewt, flus is-sagrileġġi, flus il-qtil, flus l-as­sassinju, flus mill-mard, mill-inkapaċità ta’ dawk tarja, żgħar, vulnerabbli, xi drabi safjin ukoll. Esplojtazzjoni ta’ żgħażagħ minn żgħażagħ u kbar u aktar kbar.

Meow Meow jew Mjaw Mjaw issa fis-suq. Kieku Mjaw Mjaw mhux daqstant ħażin għax xi qattusa, l-aktar forsi ta’ Jannar, kulħadd iħobb ifissidha u jmellisha, imma l-Moew Moew xi ħadd jew uħud huma responsabb­li li daħlet Malta u qiegħda tagħmel ħsara lill-qalb, lill-moħħ, l-aktar jekk titħallat mal-kokaina u l-alkoħol. Min hu responsabbli li qed jiżdied il-gwaj f’pajjiżna? M’għandniex għawġ biżżej­jed? Familji mkissrin, mifrudin, iċċassati, mifnijin, u mfaq­q­rin minħabba d-droga? Se nkomplu nżidu u nċarrtu aktar f’din il-ġerħa nazzjonali li issa donnu li tlifna l-ġlieda kontra tagħ­ha?

Grazzi Mons. Dun Vic­tor Grech, mhux biss għal dak kol­lu li ilek tagħmel mal-pop­lu Malti u Għawdxi iżda talli ġibt għall-attenzjoni tal-awtoritajiet din id-droga ġdida li s’issa għadha mhix illegali. Nappella lil dawk ikkonċerna­ti biex bla tnikkir jieħdu l-pas­si kollha neċessarji biex jiżguraw li tgħaddi leġiż­lazz­joni f’waqt­ha biex jiġi mblok­kat id-dħul ta’ din il-“qattusa” li mhux forsi taf tigref xi girfa żgħira imma daqs pan­tera sewda ċċarrat l-istess eżis­tenza. Kemm żgħażagħ tkissru, kemm indarbu f’ruħhom, f’ġi­simhom, fil-moral tagħ­hom, fl-istima lejhom infus­hom għax spiċċaw iħarsu bla ma jaraw, jitkellmu bla jafu x’inhuma jgħidu, jisimgħu bla ma jifhmu. Oħrajn li taw­ha għas-serq biex isostnu l-vizzju li bellgħalhom it-traffikant, il-baruni. U jekk mhux f’artna, barra ma na­rawx atti ta’ vjolenza u qtil biex jinsterqu nies bla ħtija biex jiġu sodisfatti t-talbiet tal-bejjiegħa tad-droga?

Il-miżerja li qegħdin iġarrbu bosta żgħażagħ jafha sew u mill-qrib Mons. Victor Grech u dawk li jaħdmu spalla ma’ spalla miegħu. Is-sema jberikom, il-paċi tkun f’qalbhom, Alla jagħtihom is-saħħa u d-dehen u l-forza u l-kuraġġ. Il-poplu huwa grat lejhom!