Is-Segretarja tal-Kunsill Nazzjonali tal-Anzjani Rose Sammut qalet li b’riżultat ta’ diversi prob­lemi li jiltaqgħu magħhom fil-ħajja ta’ kuljum, l-anzjani llum qed iħossuhom emarġinati u es­klużi mill-bqija tas-soċjetà.

Meta jitwarrbu minn dawk ta’ madwarhom, għax jaħsbu li ma jistgħux jibqgħu jagħtu iżjed kontribut fis-soċjetà, l-anzjani jħossuhom li f’ħajjithom ma baqagħlhomx iżjed skop.

Fl-intervent tagħha matul kon­ferenza bħala parti mill-kampanja tas-Sean Ewropea 2010 fil-ġlieda kontra l-faqar u l-esklużjoni soċjali, Rose Sammut qalet li hija komuni fost l-anzjani l-problema tas-solitudni, li ħafna drabi mbagħad twassal għal dipressjoni. Hija qalet li l-anzjani huma meqjusin bħala l-aktar sezzjoni vulnerabb­li fis-soċjetà iżda dan ma jfissirx li l-kontribut tagħhom m’għandux għalxiex jibqa’ jiġi apprezzat, għax wara kollox, l-anzjani huma dawk li sawwru lil pajjiżna kif nafuh illum.

Fil-preżentazzjoni tagħha, Rose Sammut qalet li kull ċitta­din Malti għandu jirrispetta u jifhem l-anzjani u jgħinhom biex jinżammu inklużi fis-soċjetà. Qalet li hemm tliet diffikultajiet ewlenin li l-anzjani jgħaddu minnhom. L-ewwel problema hija d-diskriminazzjoni li jħossu li ssir kontrihom sempliċiment għax huma anzjani. Anke jekk persuna tkun għadha ma laħqitx din l-età, ta’ 50 sena isssibha diffiċi biex issib xogħol għax min jimpjega jippreferi jsib persuna iżgħar.

Hemm ukoll il-problema tas-saħħa, li meta l-anzjani tibda tonqsilhom, isibuha diffiċli jkomplu jipparteċipaw fis-soċjetà, jekk ma jsibux għajnuna minn ta’ madwarhom u t-tielet problema hija dik finanzjarja, fejn l-anzjani jkollhom jgħaddu biss bil-pensjoni u b’dak li jkunu rnexxielhom ifaddlu.

Rose Sammut spjegat l-għanjiet tal-Kunsill Nazzjonali għall-Persuni Anzjani u kif il-Kunsill qiegħed jistinka biex jippromwovi parteċipazzjoni attiva tal-persuni anzjani fis-soċjetà u l-komunità.

Matul din il-konferenza, li tmexxiet mid-Direttur tal-Operat tal-Aġenzija Appoġġ Jesmond Schembri, tkellmet ukoll Dr Stephanie Xuereb li elenkat l-għanjiet u s-servizzi tal-kura fil-komunità mid-Dipartiment tal-Anzjani u l-Kura fil-Komunità. Hija qalet li l-persuni anzjani huma utli u ta’ valur intrinsiku fis-soċjetà tagħna. Qalet li li tixjieħ mhijiex xi marda iżda esperjenza pożittiva fejn permezz ta’ għarfien kontinwu u ta’ ġid għal-anzjani, il-persuni anzjani huma mħeġġin jieħdu kontroll fuq is-saħħa fiżika u mentali tagħhom.

Għall-konferenza attenda wkoll is-Segretarju Parlamentari għall-Anzjani u l-Kura fil-Komunità Mario Galea.