L-Avukat Ġenerali l-bieraħ appella mis-sentenza li ngħatat fit-13 ta’ Lulju li għadda fil-konfront ta’ Pierre Bartolo fejn dan ma nstabx ħati li fl-aħħar elezzjoni ġenerali pprova jinfluwenza l-mod kif jivvotaw żewġ impjegati tiegħu, Anthony Zammit u Kristylee Bezzina.

Il-każ kellu l-bidu tiegħu fit-3 ta’ Mejju, 2008, meta l-Avukat Anġlu Farrugia għadda rapport lill-Kummissarju tal-Pulizija fejn fih jingħad li Zammit għamel dikjarazzjoni miegħu fejn qal li ġie mhedded minn Bartolo biex fl-Elezzjoni tat-8 ta’ Marzu, 2008, jivvota lill-Partit Nazzjonalista u jekk ma jagħ­milx hekk kien se jitkeċċa.

Zammit allega li Bartolo talab lil ċertu Edwin Cioffi biex jieħdu jivvota u dan tal-aħħar ta lil Zammit it-telefon ċellulari tal-mara tiegħu biex jieħu ritratt bħala prova li kien ivvota lill-Partit Nazzjonalista.

Fir-rapport tissemma wkoll Bezzina li Bartolo wkoll allegatament ipprova jinfluwenzaha kif tivvota. Fil-fatt din qalet lill-Pulizija li ħassitha ippressata minn Bartolo biex tivvota lill-PN u dakinhar tal-elezzjoni staqsiha jekk ivvotatx u meta qaltlu li tilfet id-dokument tal-vot ċempel lil ommha u staqsieha għalih.

Wara ftit ommha ċemplitlu u qaltlu li sabet il-vot u Bartolo weġibha li jekk ma tivvotax u jitla’ il-Partit Laburista t-Tnejn ta’ wara setgħet ma tmurx għax-xogħol.

Fil-15 ta’ Jannar 2009 Bartolo tressaq fil-Qorti tal-Maġistrati fejn kien akkużat mill-Ispetturi Anthony Portelli u Daniel Zammit li hedded jew beżża’ liż-żewġ impjegati tiegħu biex jivvotaw b’ċertu mod. Il-każ inqata’ fit-13 ta’ Lulju li għadda fejn Bartolo ma nstabx ħati tal-akkużi miġjubin kontrih.

Din id-deċiżjoni wasslet biex il-PN fetaħ attakk fuq id-Deputat Mexxej Laburista speċjalment meta dan tkellem dwar il-każ fil-Parlament. Il-PN saħansitra qal li l-poplu jistenna apoliġija mill-Avukat Farrugia.

Issa kien imiss lill-Avukat Ġenerali li ma qabilx mas-sentenza fejn fl-appell li ressaq il-bieraħ fil-Qorti tal-Appell Kriminali huwa qiegħed isostni li l-Qorti tal-Maġistrati għamlet żball meta ma ppermettitx lill-prosekuzzjoni tikkonfronta lil waħda mix-xhieda (Bezzina) bi stqarrija li kienet għamlet qabel. Fix-xiehda tagħha Bezzina qalet li ivvotat kif riedet hi.

Huwa żied li l-fatt li Bezzina vvotat lill-partit li xtaqet hi m’hu l-ebda skużant għall-azzjonijiet ta’ Bartolo speċjalment meta fix-xiehda tagħha l-impjegata qalet li hija ma kinitx sejra tivvota.

Kien għalhekk li l-Avukat Ġenerali talab lill-Qorti tal-Appell Kriminali biex tħassar is-sentenza mogħtija fil-konfront ta’ Bartolo u tiddikjarah bħala ħati tal-akkużi miġjubin kontrih.