“Lil Hibernians bilfors nirrispettahom wara ħafna snin nilgħab magħhom u għenuni nsir il-plejer li jien. Għad għandi ħafna ħbieb midħla tal-klabb Pawlist u l-memorji magħhom huma ħafna. Iżda llum jien plejer ta’ Valletta u rrid inkompli b‘xogħli. Inzerta li t-tragward tal-100 gowl nilħqu proprju fil-logħba kontra Hibernians”.

Scerri telaq lil Hibernians fi tmiem l-istaġun li għadda wara li għenhom jirbħu l-kampjonat biex fis-Sajf iffirma għal ħames snin ma’ Valletta.

“Naħseb li wara l-istaġun li għadda kien wasal iż-żmien li niċċaqlaq. Valletta huma klabb ewlieni f’pajjiżna u naħseb kull plejer iħossu onorat jilgħab magħhom. Dejjem xtaqt li xi darba fil-karriera nilgħab ma’ Valletta u la darba ġieni ċ-ċans ħadtu.

“Mid-diskussjonijiet li kelli ma’ Valletta, il-klabb Belti kellu ambizzjonijiet kbar u kienu jissodisfaw ix-xewqat tiegħi għall-futur”.

Mistoqsi kif qiegħed iħossu ma’ Valletta u kif qiegħed jara ċ-ċansijiet ta’ Valletta għar-rebħ tal-kampjonat, l-attakkant Malti qal:

“Fil-bidu tal-istaġun Valletta għamlu diversi akkwisti u ma kenitx faċli għalina l-plejers namalgamaw ma’ xulxin malajr. Iżda issa jidher li drajna lil xulxin u qbadna r-ritmu u fil-forma li ninsabu fiha nemmen li għandna nwasslu sal-aħħar u nirbħu l-kampjonat”.

L-isfida ewlenija għalihom tidher li se tkun minn Birkirkara li qegħdin jaqsmu l-ewwel post magħhom.

“Minħabba l-aspettattivi li nbnew qabel l-istaġun konna t-tim li jrid jiġi megħlub minn kwalunkwe tim u għalhekk ma kenitx faċli għalina. Iżda maż-żmien aħna u Birkirkara nqtajna mill-kumplament u nemmen li filwaqt li ma rridux inwaqqgħu punti mat-timijiet l-oħrajn, il-konfronti diretti se jkunu determinanti”.

Finlament mistoqsi lil min jixtieq jiddedika t-tragward tal-100 gowl, Scerri qal: “Bla dubju l-ewwel dedikazzjoni tmur għall-familja tiegħi iżda ma rridx ninsa lill-plejers, diriġenti u fuq kollox lill-president ta’ Valletta, Victor Sciriha”.