Is-Sur Zarb qal li tinħass il-ħtieġa li leħen il-mara jinstema’ aktar u fl-okkażjoni ta’ Jum il-Mara wieħed għandu jaħseb fid-diffikultajiet li l-mara għaddejja minnhom f’pajjiżna. Huwa semma kif aktar ma jgħaddi żmien, aktar qed ikun hawn nisa li fuq il-post tax-xogħol jiġu sfruttati b’xogħol prekarju. Il-GWU ilha aktar minn sena tistenna lill-awtoritajiet responsabbli biex jieħdu azzjoni dwar dan.

“Ma jistax ikun li jibqa’ jkollna nisa li jitħallsu inqas mill-paga minima, jew nisa li jaqilgħu l-paga minima u li malli jsarrfu ċ-ċekk tal-paga jkollhom jagħtu parti mill-flus lil min iħaddimhom. Ma jistax ikun li jibqa’ jkun hawn nisa li jingħataw nofs il-paga tagħhom bħala prodotti tal-post tax-xogħol fejn jaħdmu,” sostna s-Sur Zarb filwaqt li qal li l-problema tal-GWU hija li meta tiġi biex tmexxi dawn l-affarijiet ‘il quddiem, tant hawn biża’ fil-pajjiż li l-persuni kkonċernati jitolbu li ma jissemmewx għax inkella jitkeċċew mix-xogħol, u għalhekk jibqgħu jiġu sfruttati.

“L-appell tagħna hu li n-nisa Mal­tin, jaħdmu fejn jaħdmu, għandhom ikunu jagħmlu parti mill-GWU – l-akbar unjin ta’ pajjiżna u l-unjin li ka­paċi tħares l-interessi tagħhom,” saħaq il-kelliem. Huwa żied jgħid li f’dawn l-aħħar jiem wara l-protesta nazzjonali kontra t-tariffi tad-dawl u l-ilma, resqu lejn il-GWU numru ta’ nisa ‘self-employed’ li wkoll għand­hom problemi kbar fil-qasam tax-xogħol tagħhom u li wkoll għandhom posthom fi ħdan din l-unjin.

Is-Sur Zarb semma wkoll l-ittra miktuba minn persuna qrib tal-GRTU li stqarr li hu ma jħaddimx nisa, u dan minħabba l-ħtiġijiet tagħ­­hom b’rabta mat-tqala u mal-kura tat-tfal. “Mela issa se nibdew inħarsu lejn il-mara bħala persuna tat-tieni klassi?” staqsa s-Sur Zarb, filwaqt li sostna li jistenna li l-GRTU tikkundanna l-istqarrija ta’ dan l-individwu.

Huwa żied jgħid li f’pajjiżna hawn bosta nisa tad-dar u ‘single mothers’ li qegħdin isibu diffikultajiet kbar biex isostnu l-familja minħabba l-piżijiet li qegħdin jiġu mġegħlin jerfgħu. L-għoli tal-ħajja, it-tariffi tad-dawl u l-ilma u ż-żie­da fil-prezzijiet tal-mediċini, fost oħ­rajn, qegħdin jikkawżaw tbatijiet kbar fil-familji.

“Aħna bħala GWU qegħdin in­­żom­mu lill-Gvern tal-ġurnata res­­ponsabbli għal dawn it-tbatijiet. Dawn huma tbatijiet li l-Gvern għandu r-responsabbiltà li jnaqqas­hom. Il-Gvern kellu okkażjoni tad-deheb biex jagħmel dan meta l-poplu sem­ma’ leħnu fil-Belt. Iżda l-Gvern, minflok ħa l-messaġġ li ppro­va jwassallu l-poplu, għalaqlu l-bieb tal-Parlament f’wiċċu. Il-GWU twiegħed, mhux biss lin-nisa iżda wkoll lill-irġiel Maltin, li se tib­qa’ timbotta ’l quddiem biex tara kif tista’ ttaffi dawn il-piżijiet. U se tagħmel dan b’responsabbiltà minkejja kull attakk li jista’ jsir fuqha,” kompla s-Sur Zarb.

Huwa kkundanna l-fatt li bnie­dem ta’ dinjità bħalma hu John Ben­cini jiġi attakkat b’dak il-mod fil-midja, u sostna li s-Sur Bencini għandu s-solidarjetà sħiħa tal-GWU. “L-unika ħaġa li għamel John Bencini kienet li għamel xogħlu, l-istess bħalna, biex isemma’ l-karba tal-poplu. U xogħolna se nibqgħu nagħmluh, aktar u aktar meta niftakru fl-istatistika li ħarġet dan l-aħħar,” qal is-Sur Zarb.

Huwa fakkar li skont din l-istatistika, 60,000 persuna f’pajjiżna jinsabu f’xifer il-faqar u 16% tan-nisa Maltin jinsabu f’xifer il-faqar ukoll. “Mela kif jippretendu li l-unjins idawru wiċċhom qisu mhu qed jiġri xejn?” staqsa l-kelliem. “Huwa dmirna li naġixxu, u ħadd u xejn mhu se jwaqqafna, minkejja kull kritika u kull attakk li jista’ jsir fuqna. Se nibqgħu naħdmu u nsemmgħu le­­ħinna għax aħna nħossu l-polz tal-poplu u m’aħniex maqtugħin min­nu. Ħadd mhu akbar mill-poplu u għalhekk għandu jsir dak li jrid il-poplu. Għalhekk fil-jiem u l-ġimgħat li ġejjin se nkunu fuq quddiem biex nibqgħu niddefenduh.”