Lydia Abela ġiet avviċinata mill-Mexxej Laburista stess biex tikkontesta l-kariga u hi ġiet magħżula b’votazzjoni sigrieta unanima tal-eżekuttiv nazzjonali.

L-avukatessa Lydia Abela, spjegat li r-rwol tagħha se jkun wieħed attiv u li se tassigura li l-istrutturi tal-Partit Laburista mhux biss ikunu mera tas-soċjetà imma jirriflettu dak li verament jemmnu. Saħqet li l-moviment irid jiġbor fih lill-ħaddiema, ‘self employed’, il-persuni tal-klassi tan-nofs, anzjani, u żgħażagħ. Enfasizzat li hi se tara li bil-ħidma li ssir dan il-moviment ikompli jikber u jitkattar, b’politika nadifa u li ma tiddiskriminax.

Min-naħa tiegħu l-Mexxej Laburista, Joseph Muscat, qal li din il-ħatra tirrifletti ir-rwol tal-mara tas-soċjetà. Waqt li ddeskriva lil Lydia Abela bħala storja ta’ suċċess, irrimarka li kien hu stess li avviċina lil Lydia għall-kwalitajiet li għandha fosthom dik tal-bilanċ bejn id-dinja tax-xogħol u l-familja.

L-Avukatessa Lydia Abela, minn Bormla twieldet nhar it-18 ta’ Ottubru 1978 u hi t-tielet fost ħames ulied ta’ Anthony u Emanuela Zerafa. Ħadet l-edukazzjoni tagħha fil-Liċeo Maria Reġina, fi Blata l-Bajda u studjat fl-Università ta’ Malta.

Għal numru ta’ snin ħadet sehem attiv fil-qasam tal-volontarjat fosthom dak edukattiv u soċjali fil-lokalità tagħha u għal xi żmien f’organizazzjoni oħra filantropika.

Fis-sena 1999 kisbet il-Baċellerat fl-Istudji Legali u fis-sena 2000 gradwat bħala Nutar Pubbliku. Fis-sena 2001 kisbet diploma biex tipprattika bħala avukat quddiem it-tribunal ekkleżjastiku.

Fis-sena 2002 kisbet Dottorat fil-Liġi u fl-istess sena kisbet Master Degree fil-Liġi Marittima mill-International Maritime Organisation.

Dr Abela, ilha tipprattika bħala avukat fil-Qorti ta’ Malta għal dawn l-aħħar seba’ snin u tispeċjalizza fil-liġi matrimonjali, ċivili, industrijali u marittima. L-avukatessa Abela hi miżżewġa lill-Avukat Robert Abela.