L-aħħar laqgħa li l-Għaqda Parteċipanti Karnival kellha mal-Ministru Cristina kien nhar il-Ħamis wara nhar it-Tlie­ta kellhom laq­għa oħra mal-Prim Mi­ni­stru. Iżda minn dawn iż-żewġ laqgħat ma ħareġ xejn ħlief l-offerta tal-Gvern f’Ta’ Qali. Nifhmu li meta l-Għaqda għamlet laqgħa mal-mem­bri kollha, dawn kienu un­animi u ma aċċettawx l-offerta.

Sadanittant ilbieraħ waqt konferenza tal-aħbarijiet li saret mill-Kunsill Malti għall-Kultura u l-Arti tħabbar il-prog­ramm kollu tal-Karnival ta’ din is-sena li jibda nhar il-Ġimgħa, 12 ta’ Frar u jibqa’ sejjer sat-Tlieta 16 ta’ Frar.

Waqt din il-konferenza Busuttil ikkonferma li għal­kemm il-programm se jsir kollu, l-Għa­qda Par­teċipanti Karnival se jkunu qegħ­­din iwasslu mess­aġġ ta’ ­pro­­testa fuq il-karrijiet kollha. Qal li “issa faqqgħet il-bomba li ilha biex tisplodi”. Qal li wara nhar it- Tlieta, 16 ta’ Frar ħadd minn dawk li ilhom jarmaw il-karrijiet mhu se jkollu post fejn jaħdem.

Minkejja dan qal li l-Karnival ta’ din is-sena se jkun ta’ livell għoli ħafna kemm f’dawk li huma karrijiet u kemm fil-kompetizzjonijiet taż-żfin. Qal­­ li d-dilettanti tal-Karnival il­­hom jaħ­dmu minn ftit wara l-Kar­nival tas-sena l-oħra u għalhekk mhumiex se jħassru l-ebda festi għax wara dawn is-sagrifiċċji kollha jridu mhux biss igawdu l-Karnival huma, im­ma jagħtu spettaklu lil dawk kollha li se jattendu.

Bustuttil qal li minħabba li l-Gvern ħabbar li sal-aħħar ta’ ­ Jannar kien se jkun diġà beda jħaffer Misraħ il-Ħelsien b’rabta mal-proġett ta’ Bieb il-Belt, l-Għaqda kel­lha tagħmel xi tibdiliet fil-karrijiet fosthom li jku­nu xi ftit iżgħar. Dan minħabba li kienu se jgħaddu minn Triq l-Arċisqof minħabba x-xogħol f’Mi­­s­raħ il-Ħelsien.

Imma għadda l-aħħar ta’ Jannar u ninsabu f’nofs Frar u x-xogħol f’dan il-Misraħ għadu ma bediex. Imma l-karrijiet tal-Karnival diġà sarulhom il-modi­fi­kazzjonijiet kollha.

Il-konferenza ġiet indirizzata wkoll minn Adrian Mamo, Ċermen tal-Kunsill. Huwa aċċenna għal qagħda li jinsab fiha l-Karnival ta’ Malta u li s’issa għad ma ntlaħaq ebda ftehim fejn se jarmaw il-karrijiet wara nhar it-Tlieta. Madankollu qal li hemm l-intenzjoni li tinstab xi tip ta' soluzzjoni.

Tkellmu wkoll is-Sindku tal-Floriana Nigel Holland li meta mistoqsi minn l-orizzont għal­iex il-Korp tal-Pulizija kien sab diffikultà jagħti permess lill-Kunsill Lokali biex jagħlaq Triq Sant’Anna fl-aħħar tas-sena u din is-sena minħabba l-Karnival se tingħalaq darbtejn, Holland qalilna li l-Pulizija kienu qalulu li l-Karnival hija attività nazzjonali. Huwa qal li barra l-Karnival, Triq Sant’Anna se terġa’ tin­għalaq f’Mejju meta madwar il-Belt se jkun hemm il-Grand Prix tal-karozzi klassiċi u għalhekk Triq Sant’Anna se tintuża bħala venda għall-karozzi tal-linja.

Filwaqt li Anton Miceli, ‘Pro­ject Manager’ Karnival ta’ Malta 2010, spjega fid-dettal il-prog­ramm kollu fosthom xi affarijiet ġodda, Alison Bezzina mill-kum­­­­panija Melita, sponsor ewlieni tal-Karnival, qalet li tittama li tinstab soluzzjoni għax il-Melita hija impenjata li tissponsorja anke l-Karnival tas-sena d-dieħla.

• Sadanittant fil-Parlament, il-Ministru Dolores Cristina qalet li numru sostanzjali ta’ mħażen li bħalissa qed jintużaw mill-parteċipanti tal-Karnival bil­kemm jistgħu jissejħu mħażen, peress li dawn jifformaw parti mill-wirt storiku u kulturali ta’ pajjiżna, bħal kappella barokka u l-Forti ta’ Sant’Iermu.

Qalet li l-Gvern fassal proġett ta’ restawr għal ħafna minn da­wn is-siti storiċi u sabiex dan iseħħ, jeħtieġ li l-parteċipanti jħa­llu l-post li qegħdin jużaw bħalissa u jmorru jaħdmu f’post aktar addattat.

Saħqet li dan qed jiġi diskuss flimkien mal-Għaqda Parteċipanti Karnival stess. Il-Ministru saħqet li l-Gvern offra sit f’Ta’ Qali biex dan isir Villaġġ tal-Karnival li mhux biss jipprovdi “premesis” biex jinbnew il-karrijiet tal-karnival, iżda jista’ jiż­viluppa l-industrija tal-karnival­, marbuta mas-settur tat-Turiż­mu u tal-Arti u l-Kultura. Il-Minis­­tru kienet qed twieġeb mistoqsija Parlamentari tad-Deputat Laburista Owen Bonnici.