Imma Dun Mikiel Azzopardi (ritratt) kellu rasu iebsa aktar minn tal-Arċisqof u minkejja li dan tal-aħħar tant ħadha miegħu li saħansitra sejjaħlu “miġnun”, l-istorja turi li fl-aħħar mill-aħħar għaddiet tal-qassis.

Prova ta’ dan mhux biss hi d-dar li l-qassis fetaħ għal nies b’diżabilità (Dar tal-Providenza fis-Siġġiewi), li għadha tagħmel il-mirakli sal-lum, imma anke l-mod kif aħna tgħallimna nistmaw lit-tfal b’diżabilità tagħna, li flok nitfgħuhom f’kantini, bħalma kien jiġri fil-passat, qegħdin nintegrawhom b’mod b’saħħtu fis-soċjetà.

Bil-mod titwemmen, imma l-is­tor­ja turi wkoll li l-aktar biċċa xo­għol diffiċli għal dan il-qassis ma ki­nitx li jikkonvinċi lill-Arċisqof jew li jibni din id-dar, imma fl-aħ­ħar mill-aħħar li jsib lit-tfal u nies b’diżabilità li tant kienu jinħbew tajjeb li kultant lanqas l-istess ġirien ma kienu jkunu jafu li jeżistu.

Il-passat tagħna fejn jikkonċerna nies b’diżabilità hu wieħed tal-mistħija, imma dan issa ħassarnih darba għal dej­jem bis-saħħa ta’ Dun Mikiel Azzopardi, li nhar l-Erbgħa, fil-festa ta’ San Pawl, infakkru l-100 sena mit-twelid tiegħu.