|
Il-midfielder internazzjonali Malti, Andrč Schembri, il-bieraħ mar l-Ungerija biex proprju llum jiffirma ma’ Ferencvaros fejn se jingħaqad mal-gowlkiper internazzjonali Malti, Justin Haber, li f’Jannar li għadda wkoll iffirma ma’ dan il-klabb mingħand Sheffield United li nċidentalment iż-żewġ klabbs rispettivi huma mmexxijin mill-istess sid.
Schembri se jiffirma sal-aħħar tal-istaġun b’għażla li jestendi l-kuntratt tiegħu. F’kumment li ta lil dan il-ġurnal, Schembri sostna li kellu żewġ offerti oħra minn klabbs mill-Iżrael u l-Ġermanja iżda l-aħjar waħda kienet dik tal-klabb Ungeriż u jinsab kuntent ħafna li se jingħaqad ma’ Haber.
Matul ix-xahar ta’ Jannar, Schembri ingħata r-release mill-klabb tal-Ewwel Diviżjoni, SK Austria Karnten, minħabba kriżi finanzjarja.
Schembri li fil-karriera tiegħu lagħab ma’ Hibernians, Marsaxlokk, Eintracht Braunschwieg u Carl Zeiss Jena, iddebutta ma’ Karnten, fis-17 ta’ Lulju, 2009, fit-telfa ta’ 3-1 kontra SC Magna. Huwa lagħab 13-il logħba fil-kampjonat u skorja gowl wieħed.
|
