Il-poloz tal-preliminari tal-Euro 2012 ġew imtellgħin il-bieraħ, f’Varsavja, li fihom kie­net involuta Malta flimkien ma’ 50 pajjiż ieħor Ewropej waqt li ż-żewg pajjiżi li se jospitaw il-finali, il-Polonja u l-Ukrajna, hu­ma garantiti minn posthom bħa­la finalisti.

Għal dawn il-poloz fost il-mijiet ta’ diriġenti u kowċis kien hemm preżenti wkoll il-kowċ nazzjonali John Buttigieg u l-manager tat-tim, Ivan Vella.

Malta messitha x-xorti li titla’ fi Grupp F flimkiem mal-Kroazja, Grecja, Iżrael, Latvja u Georgia, jiġifieri, fi grupp ta’ sitta li bħalu hemm ħamsa oħra waqt li tliet gruppi huma komposti minn ħames timijiet kull wieħed.

Fil-passat Malta lagħbet kontra t-timijiet kollha li jinsabu fil-grupp iżda kontra l-Latvja u Georgia l-logħbiet kienu ta’ ħbiberija jew f’tournaments ta’ ħbiberija. Għalhekk dawn tal-aħħar huma avversarji ġodda għall-Maltin f’dan il-kampjonat.

L-aktar pajjiż li Malta lagħbet kontrih f’din il-kompetizzjoni huwa l-Greċja meta kontrihom lgħabna tmien logħbiet li minnhom ġiet miksuba rebħa u żewg draws. Infatti kienet fl-aħħar edizzjoni li lagħbu kontra xulxin li l-Maltin ma rnexxielhomx jieħdu xi punti kontra l-Grie­gi fejn ta’ min isemmi d-draw 1-1, fl-1970, ir-rebħa storika ta’ 2-0, fl-1975, u d-draw ta’ 1-1 ukoll, fl-1991.

Kontra l-Kroazja Malta lagħbet erba’ darbiet, tnejn minnhom fit-Tazza tad-Dinja, biż-żewġ konfronti fil-Euro jispiċċaw f’reb­ħiet għall-Kroati, 4-1, f’ta’ Qali u 2-1 f’Zagreb li fiha l-Maltin lagħbu logħba kbira.

Anke kontra Iżrael kien hemm żewġ konfronti fil-Euro fejn f’pajjiżna tlifna 2-0 waqt li fil-logħba away li saret fi grawnd newtrali fit-Turkija ġiet miksuba draw ta’ 2-2.

Dan juri li almenu kontra t-tliet avversarji msemmija ġie li ksibna riżultati pożittivi għal­kemm il-bilanċ jaqleb favurihom.

Ta’ nkoraġġiment huwa l-fatt li kontra Georgia, Malta lagħbet ħames darbiet u l-ewwel rebħa kontrihom waslet is-sena li għad­diet eżattament fid-debutt ta’ John Buttigieg fil-kariga. Dak in-nhar Malta rebħet bl-iskor ta’ 2-0.

Anke kontra l-Latvja qatt ma lgħabna f’kompetizzjoni u mit-tliet konfronti Malta kisbet żewġ rebħiet bil-gowls ikunu parità, tlieta favur u tlieta kontra.

Forsi wieħed kien jippreferi li Malta titla’ kontra pajjiż iktar rinomat bħala tim issidjat minflok il-Kroazja, iżda qabilhom telgħu l-Olanda li tpoġġew fi Grupp E u l-Ingilterra li tpoġġew fi Grupp G. Ta’ min jgħid li ż-żewġ pajjiżi l-oħra li kien fadal mal-Kroazja u l-Ingilterra kienu l-Portugall u Spanja.

Fi Grupp A, il-Ġermanja hu­ma l-favoriti meta l-ikbar sfida tista’ tiġi mit-Turkija waqt li fi Grupp B, ir-Russja għandhom lis-Slovakkja u l-Irlanda li jistgħu jostakolawhom.

L-Italja ma tantx jidhru fil-periklu fi Grupp C ħlief mis-Serbja bit-timijiet l-oħra ma jidhrux li jistgħu jħabbtuhom.

Franza wkoll huma favoriti fi Grupp D bir-Rumanija jidhru l-aħjar mill-oħrajn għat-tieni post waqt li l-Olanda u l-Isvezja jissieltu għal post minn Grupp E.

Fil-Grupp F li fih hemm Malta, il-Kroazja jidhru favoriti bil-Greċja u Iżrael l-aktar li jistgħu jistgħu jkunu ta’ ostakolu għa­-lihom.

L-Ingilterra ma jidhrux fil-pe­riklu li jitilfu Groupp G bi Grupp H donnu wieħed Skan­dinav meta jinkludi lid-Danimarka, in-Norveġja u l-Islanda li magħhom għandhom lill-Portugall li iktar jistgħu jiġu mħabbta mid-Daniżi.

Fi Grupp I, Spanja għandhom lir-Repubblika Ċeka u l-Iskozja, iżda huma jidhru tajbin biex ma jiġux sorpriżi.

Kull min jirbaħ il-grupp jgħaddi għall-finali kif ukoll l-aħjar tim li jispiċċa fit-tieni post bit-tmien timijiet l-oħra jilagħbu fi play-offs għall-aħħar erba’ postijiet biex jingħaqdu mal-Polonja u l-Ukrajna fil-finali.

Il-preliminari jibdew minn Set­tembru li gej u jintemmu f’No­vembru tal-2011.



GRUPP A

ĠERMANJA

TURKIJA

AWSTRIJA

BELĠJU

KAZAKHSTAN

AZERBAIJAN



GRUPP B

RUSSJA

SLOVAKKJA

IRLANDA

MAĊEDONJA

ARMENJA

ANDORRA



GRUPP Ċ

ITALJA

SERBJA

IRLANDA TA’ FUQ

SLOVENJA

ESTONJA

FAROE ISLANDS



GRUPP D

FRANZA

RUMANIJA

BOSNJA

BELARUS

ALBANIJA

LUSSEMBURGU



GRUPP E

OLANDA

SVEZJA

FINLANDJA

UNGERIJA

MOLDOVA

SAN MARINO



GRUPP F

KROAZJA

GREĊJA

IŻRAEL

LATVJA

GEORGIA

MALTA



GRUPP G

INGILTERRA

SVIZZERA

BULGARIJA

WALES

MONTENEGRO



GRUPP H

PORTUGALL

DANIMARKA

NORVEĠJA

ĊIPRU

ISLANDA



GRUPP I

SPANJA

REP. ĊEKA

SKOZJA

LITWANJA

LIECHTENSTEIN