Raġel ta’ 33 sena minn San Ġwann dalgħodu se jibda għaddej ġuri b’konnessjoni mal-qtil ta’ mara li kien seħħ sitt snin ilu f’Ta’ Qali. Carmel Vella magħruf bħala l-“Gagu” mhux se jkun akkużat bid-delitt innifsu, imma bis-sehem tiegħu f’attentat li sar ftit żmien qabel biex tkun eliminata l-vittma, fejn dakinhar il-pjan kien li tintefa’ minn fuq l-irdum fl-Aħrax tal-Mellieħa.

Il-każ jirrigwarda d-delitt ta’ Patricia Attard li, fil-lejl ta’ bejn it-13 u l-14 ta’ Frar tal-2004, inqatlet b’tiri ta’ pistola f’rasha. Il-kadavru kien instab fil-vann, li kienet tuża fix-xogħol tagħha, f’post imwarrab f’Ta’ Qali mill-Pulizija tal-Mobile waqt li kienu qegħdin jagħmlu ronda fl-inħawi. Il-vittma li kienet mill-Ħamrun u li kellha 55 sena kienet taħdem mal-kumpanija tal-familja bħala sewwieqa ta’ Mini Bus.

Fil-ġuri, li se jibda jinstema’ llum quddiem l-Imħallef Joseph Galea Debono, Vella se jkun akkużat li ġimgħat qabel id-delitt kien ftiehem ma’ persuna oħra biex joqtlu lil Attard. Din il-persuna hija Josef Grech, ta’ 38 sena minn Ħal Balzan, li wkoll kien jaħdem bħala xufier mal-kumpanija tal-vittma u li qed jistenna biex jgħaddi ġuri separat fuq il-qtil tagħha.

Skont ma jingħad fl-att tal-akkuża li se jiffaċċja Vella u li fiha kap wieħed, iż-żewġt irġiel kienu ftehmu li jħajru lil Attard tmur magħhom x’imkien lejn l-Aħrax tal-Mellieħa u kif tersaq lejn it-tarf tal-irdum, jimbuttawha għal isfel. Hu allegat li Vella kien ġie mwiegħed is-somma ta’ Lm10,000 (€23,293) għas-sehem tiegħu fid-de­litt.

B’eżekuzzjoni ta’ dan il-pjan maħsub minn qabel, xi ġranet qabel l-14 ta’ Frar, tal-2004, Grech mar fejn it-Torri l-Aħmar flimkien ma’ Attard billi qalilha li kie­nu sejrin hemmhekk b’konnessjoni ma’ xi ġarr ta’ klandestini. Vella kellu jiltaqa’ magħhom fuq il-post, kif fil-fatt għamel. Iżda għalkemm irnexxielhom jeħduha sal-Aħrax tal-Mellieħa, il-pjan tagħhom sfratta minħabba li l-mara beżgħet tersaq lejn tarf l-irdum.

Għaldaqstant Vella se jkun akkużat li assoċja ruħu ma’ ħaddieħor bil-għan li jikkommetti omiċidju volon­tarju, billi kellu l-ħsieb li joqtol lil Attard fl-ewwel attentat li falla fuq ħajjitha. Il-prosekutur fil-ġuri se tkun l-Avukatessa Lara Lanfranco, waqt li l-akkużat se jkollu jiddefendih lill-Avukat Roberto Montalto.