B’risposta għall-artiklu li ġie ppubb­likat fil-faċċata ta’ l-orizzont nhar il-Ġimgħa li għadda (“Il-Gvern ‘jixxaħ­ħaħ’ għax-xiri ta’ ‘defibrillator’ għall-Qrati tal-Ġustizzja: €165,000 fl-ajru”), il-Ministeru għall-Ġustizzja u l-Intern qal li s-safar imsemmi hu ġustifikat.

Il-Ministeru qal li “l-figura kkwotata ta’ €165,000 f’safar ma sarux mill-Ministru tal-Ġus­tizzja u l-Intern nnifsu, imma mill-Ministeru kollu u saru biex ikopru d-diversi kumitati u impenji, li fost oħrajn, l-UE tirrikjedi. Għalhekk l-impressjoni li qiegħda tingħata fit-titlu tal-artiklu hi għal kollox żbaljata u maqtugħa mir-realtà.

“Il-Ministru tal-Ġustizzja u l-Intern, is-sena l-oħra kellu jsiefer 20 darba b’konnessjoni mal-ħidma ma taqta’ xejn li saret biex, minbarra li jsir ix-xogħol rikorrenti fi ħdan il-Kunsill tal-Ministri tal-UE, isiru wkoll diversi laqgħat bilaterali li servew biex jiġu difiżi l-inte­ressi tal-pajjiż, meta nqalgħu kwistjonijiet internazzjonali, kif ukoll biex jintlaħqu diversi miri, ewlenin fosthom li l-Uffiċ­ċ­ju Ewropew għas-Sostenn fil-Qasam tal-Ażil (EASO), li mill-bidu se jimpjega mas-60 persuna b’salarji tal-UE u se jkollu baġit ta’ €55 miljun fuq tliet snin, jitwaqqaf f’pajjiżna.

“Dawn il-vjaġġi, li l-maġġo­ran­za assoluta tal-ispejjeż tagħ­hom marret fuq il-ħlas ta’ bil­jetti tal-ajru, b’kollox swew €49,603, li terġa’ parti minn­hom se tiġi wkoll rifuża mill-UE. Kull vjaġġ kien assolutament meħtieġ, kien marbut mad-diversi inizjattivi li ttieħdu u sar fl-iqsar żmien possibbli, b’uħud jieħdu inqas minn 48 siegħa. Ta’ min jgħid ukoll li l-ispiża finali kienet ferm inqas mill-baġit allokat apposta mill-Ministeru tal-Finanzi biex jiġu koperti spejjeż marbutin mal-inizjattiva biex Malta tirbaħ is-sit tal-EASO.

“Id-donazzjoni ta’ ‘defibrillator’ mill-Malta Heart Foundation saret fuq inizjattiva tal-fondazzjoni nnifisha u għalhekk m’għandha x’taqsam assolutament xejn mas-safar tal-Ministru. Għalhekk, jidher ċar li l-artiklu inkwistjoni jagħti stampa għal kollox differenti minn dik attwali, jinjora kompletament lir-rwol importanti li Malta trid taqdi fl-UE u bl-ebda mod ma jieħu kont tal-inizjattivi kruċjali li tmexxew b’tant sagrifiċċju, imma b’suċċess minn dan il-Ministeru,” ittemm l-istqarrija.

Irid jingħad li l-orizzont fir-rapportaġġ tiegħu qatt ma qal li l-€165,000 f’safar is-sena l-oħra saru mill-Ministru waħ­du, kif ipprova jagħti l-im­pressjoni l-Ministeru biex jiġ­ġus­tifika n-nefqa. Itta­majna li l-Ministeru jgħid għa­liex apparat meħtieġ bħal dan kien nieqes mill-qrati u li ma kienx għall-fondazzjoni wisq probabbli ma nxtarax.