Qarrej ta’ dan il-ġurnal ilmenta magħna li fejn qabel il-kont tad-dawl għall-garaxx li għandu kien jiġi madwar €80, l-aħħar kont li rċieva mingħand il-kumpanija ġdida, Automated Revenue Management Services Ltd (ARMS), huwa ta’ €325.95 u dan għal żewġ tubi li jinxtegħlu biss għall-bżonn.

L-istess qarrej qalilna li meta mar jara l-meter sab li l-meter kien qed jaqra 00096 units u l-kont li rċieva kien għal konsum ta’ 308 units, li skont il-kont fl-aħħar qari il-‘current reading’ kien ta’ 4857 units.

“Kif qed tara hemm baħar jaqsam bejn il-qari attwali tal-meters u dak li jidher fuq il-kont li bagħtuli. Miskin hu min jaqbad u jmur iħallas mingħajr ma jivverifika,” qalilna l-qarrej.

Huwa kompla jgħidilna li anke fil-kont li ħallas qabel kien ħallas ħafna iżjed għax sal-lum għadu ma kkonsmax daqshekk kurrent. Dan il-kont suppost ikopri perjodu ta’ 144 ġurnata biss u skont ARMS fl-aħħar tal-kont fakkru lill-qarrej li tul dan il-perjodu l-elettriku li uża ġġenera aktar minn 2,410 kilogrammi ta’ CO2, minn żewġ tubi.

pisani.journalist@gmail.com

http://www.johnpisani.net