Prinċipju ieħor tal-moviment se jkun dak li “jgħożż id-demokrazija. Issemma’ leħ­nek mingħajr intimidazzjoni. Wieħed mill-impenji tal-moviment hu li anke min ma jaqbilx magħna se jkollu l-libertà kollha li jgħid dak li jħoss.”

Il-Mexxej tal-moviment kompla jgħid li “l-moviment se jkun jemmen fil-konsultaz­zjoni vera qabel ma jittieħdu d-deċiżjonijiet. Mhux limitat għal ċerti nies imma li jinkludi lill-unjins kollha ta’ pajjiżna fil-Kunsill Malti għall-Iżvilupp Ekonomiku u Soċjali (MCESD) ħa jsemmgħu leħinhom bħall-għaqdiet ta’ min iħaddem.”

“Il-moviment se jkun jirrispetta l-valuri ta’ pajjiżna. Kull bidla se tirrispetta s-sisien tagħna bħala soċjetà. Valur fundamentali tal-ħajja. Moviment totalment kontra l-in­tro­duzzjoni tal-abort f’pajjiżna. Moviment li se jixpruna d-drittijiet ċivili għal soċjetà denja fid-diċennju l-ġdid”, kompla jgħid Dr Muscat.

“Il-moviment se jaspira għal Stat lajk, li jkun ħabib tal-Knisja – imma mhux ħaġa waħ­da mal-Knisja. Stat li ma jindaħalx lill- in­dividwi fl-għażliet tagħhom. Stat li jħobb il-familja u li ma jkomplix jabdika mid-dmi­rijiet tiegħu għat-tisħiħ tal-familja. Ma tgħab­bix piżijiet fuq il-familji u li tgħin fil-preparazzjoni ta’ familji ġodda.”

Dr Muscat saħaq li “moviment li ma jiddejjaqx li jiddiskuti l-bżonnijiet il-ġodda tas-soċjetà. Mhux lest li jitfa’ l-affarijiet taħt it-tapit. Se nintroduċi personalment abbozz ta’ liġi dwar id-divorzju, b’vot ħieles lill-Mem­bri Parlamentari. Ma rrid niġġudika l-ħajja privata ta’ ħadd. Kulħadd għandu jin­għata ċ-ċans għat-tieni opportunià fil-ħaj­ja. Nistenna li n-naħa l-oħra, ukoll tagħti vot ħieles lill-membri Parlamentari tagħ­ha.”

Il-Mexxej tal-Moviment tal-Progressivi u l-Moderati qal ukoll li “l-moviment mhux se jiġġudika l-orjentazzjoni sesswali tal-per­suni differenti. Ma jħarisx lejn persuni ‘gay’ bħala marda. Mhux imaqdar u jiġġudika imma li jirrispetta lil kulħadd. Moviment tal-ugwaljanza bejn is-sessi bħala dritt u mhux pjaċir lin-nisa. Miżuri li jibbilanċjaw bejn il-ħajja u x-xogħol. Moviment li se jkun minn ta’ quddiem biex jimbotta lin-nisa fil-politika”.



"Qed nipprovaw ninghogbu...min ma jemminx mhux postu maghna"

Fid-diskors tiegħu, Dr Joseph Muscat wieġeb għall-kritika li kienet qiegħda ssir b’mod kostanti – dik li kien qed jipprova jingħoġob ma’ kulħadd. Qal li “hawn min qed jgħidilna li qegħdin nipprovaw nin­għoġbu ma’ kulħadd. Le, xejn minn dan. Jekk ma temminx f’dawn il-prinċipji li semmejt, mhux postok fil-moviment tal-prog­ressivi u l-moderati.”

“Irridu nkunu moviment tax-xogħol. Aħna jinteressawna l-kontijiet għax hemm punt aktar fundamentali – ix-xogħol. Dik id-deċiżjoni qiegħda timmina l-ħolqien tax-xogħol f’pajjiżna. Ix-xogħol ikisser il-faqar u jgħolli l-livell tal-għixien tal-klassi tan-nofs. Il-moviment irid Stat li ma jżidx il-piżijiet, ma jżidx it-toqol fuq il-familji. Irridu nagħmlu s-servizzi tas-saħħa pubblika u l-edukazzjoni pubblika l-aqwa fil-pajjiż, fl-istess waqt li nħallu lill-Knisja u lill-pri­vat ikomplu jaħdmu bl-aqwa mod possibbli.”



Min jabbuza mill-haddiema... ma jihux kuntratti tal-Gvern

Il-kwistjoni tal-abbużi fuq il-ħaddiema u l-iskjavitù modern ukoll kien trattat mill-Mexxej tal-Progressivi u l-Moderati. B’re­ferenza ċara għall-kuntratti li ngħataw mill-Gvern lill-kumpaniji li kienu qegħdin jabbużaw mill-ħaddiema billi anke jagħtuhom paga inqas mill-paga minima, hu qal li “l-moviment se jara li min jabbuża mill-ħaddiema ma jiħux aktar kuntratti mill-Gvern”.

“Il-moviment se jkun tal-edukazzjoni u tal-innovazzjoni, bit-tfal fiċ-ċentru u l-ġeni­turi u l-għalliema imseħbin fil-proġett. Irridu nkissru l-figura ta’ erba’ minn kull għaxart itfal li ma jkomplux bl-edukazzjoni wara s-16-il sena. Nemmnu fir-riċerkaturi Maltin li huma fost l-aqwa fl-Ewropa. Dan se jkun moviment tas-solidarjetà soċjali fejn il-viżjoni tagħna ta’ Stat hu ta’ Stat li ma jindaħalx imma li ssibu meta jkollok bżonn. Mhux Stat ta’ burokrazija imma Stat li permezz ta’ servizzi soċjali flessibbli issibhom hemm meta taħseb li inti waħdek – meta taħseb li ħadd ma jista’ jgħinek. Appell lill-ħaddiema taċ-ċivil biex jissieħbu f’dan il-proġett. Mhux il-klijent għandu tort imma s-sistema – u allura ejjew nirranġaw is-sistema. Għandna l-eżempju tas-16,000 persuna li ma kinux jafu li min­ħabba l-ftit żieda tal-għoli tal-ħajja suppost bħala kumpens għaż-żieda fil-prezzijiet, se jitilfu l-għajnuna supplementari li għandhom bżonn biex jgħixu. Servizzi soċjali li jirrispettaw lill-anzjani li taw snin twal ta’ ħidma għal pajjiżna. L-anzjan mhux toqol fuq is-soċjetà imma esperjenza vasta. Inħarrxu l-liġijiet kontra l-vjolenza fuq l-anzjani. Nassiguraw li l-persuni b’diżabilità jkollhom opportunitajiet fid-dinja tax-xogħol. Niftħu diskussjoni dwar x’jagħmlu l-persuni b’diżabilità meta l-ġenituri tagħ­hom jiġu neqsin.”



Moviment ta' sahha ta' kwalita'

Joseph Muscat emfasizza li “dan se jkun moviment tas-saħħa ta’ kwalità, saħħa fil-ħin u saħħa b’xejn. Mhux saħħa ta’ imwiet fuq l-istreċer. Irridu ninvestu aktar biex ikollna ħinijiet determinati minn qabel ta’ kemm persuna tista’ tistenna għal operazzjoni fuq il-lista ta’ stennija. Bħal m’għamel il-Gvern Laburista Ingliż, aħna se ndawru s-servizz għal wieħed mill-aqwa fl-Ewropa. Irridu nkunu moviment tal-klassi tan-nofs. Din se tkun id-dar għal dawn in-nies. Il-klassi medja kienet drat taħdem aktar biex imexxu l-familja tagħhom ’il quddiem. Imma illum qegħdin jaħdmu aktar u jaqilgħu ferm inqas. Klassi li qiegħda taqla’ fuq rasha. Il-klassi tan-nofs hi ċ-ċavetta tas-suċ­ċess. Se nkunu moviment tal-ekonomija u se noħorġu lill-pajjiżna mir-riċessjoni. Ekonomija li tikber għax tagħti l-flus fil-bwiet tal-ħaddiema, tas-‘self employed’ u tal-is­tudenti. Viżjoni ekonomika ta’ xogħol u ġid. Il-moviment mhu se jaċċetta qatt li jkun hemm id-daqqa tal-kontijiet tad-dawl u l-ilma. Tnaqqis sostenibbli ta’ taxxi. Nem­mnu fit-turiżmu bħala ċ-ċavetta mill-ġdid għas-suċċess tal-ekonomija. Il-ħaddiema kol­lha fis-settur jingħataw il-motivazzjoni. Moviment li joħloq il-‘green jobs’. Moviment li jassigura li Għawdex joħloq ix-xogħol għall-Għawdxin imma wkoll għall-Maltin”.



"Min ge maghna mhux se jintrabat ma' partit imma ma' hsieb"

Dr Muscat qal ukoll li “dan se jkun mo­viment tal-prinċipji li dejjem kienu f’qalbna. Dan hu l-moviment tal-ġustizzja soċjali. Mhux biżżejjed jinħoloq il-ġid imma jrid jin­qasam ġustament. Min miexi ‘l quddiem jibqa’ miexi ‘l quddiem, imma rridu ngħinu lill-batut. Dan il-partit irid ikun l-partit li jaqbeż għall-foqra. Se jkun moviment li jem­men fit-trasparenza politika. Jemmen f’paj­jiż li jimxi skont x’taf u mhux skont lil min taf. Il-korruzzjoni hi taxxa oħra fuq il-fa­milji. Stat li jibża’ għall-assi tiegħu. Stat li ma jkollu xejn kontra l-privatizazzjoni imma assi kruċjali u strateġiċi ma jistgħu jinbiegħu qatt. Nerġa’ ntenni t-twissija, li l-Air Malta mhix għall-bejgħ”.

“Dan se jkun moviment tal-konsumaturi bi drittijiet Ewropej, kemm tal-prodotti u servizzi tal-Istat kif ukoll tal-privat. Movi­ment taż-żgħażagħ li se jkunu l-mutur li jix­prunaw il-bidla. Moviment għall-ambjent. Wieħed mill-akbar sfidi ta’ din il-ġe­ne­razzjoni hi l-isfida tal-ambjent. Irridu nku­nu kreattivi. Irridu li jkun hemm reklamar ta’ art mill-baħar. Fuq in-nifs u l-arja, inkwetati bil-livell ta’ arja li qegħdin jieħdu t-tfal Maltin. Aħna m’aħniex komdi li ngħi­xu f’din is-sitwazzjoni”.



Moviment tal-Gustizzja Socjali u l-konsumaturi

Fid-diskors tiegħu l-Mexxej tal-Moviment tal-Progressivi u l-Moderati qal li “ap­prezzajna lil dawk li dejjem kienu magħna. Smajna lil dawk l-eluf li jħossuhom maqtugħin mill-politika u lil dawk li emmnu fl-elezzjoni li għaddiet li l-Partit Laburista ma kienx l-aħjar għażla.

Din il-konferenza poġġietna f’salib it-toroq fi żmien meta spiċċaw il-monopolji eko­nomiċi u politiċi. Spiċċa ż-żmien meta bilfors trid tintrabat ma’ partit jew ieħor. M’hemmx voti tagħna u voti tagħhom. Il-voti huma tan-nies li jieħdu d-deċiżjoni minn darba għal oħra. Ħerġin minn era tal-partiti tal-bieraħ. Min ġej fostna mhux se jintrabat ma’ partit imma ma’ idea ta’ Malta bħala l-aqwa fl-Ewropa. Qegħdin naraw nies minn kull oqsma, ta’ kull età, li qegħdin jaqsmu magħna l-ideal. Dan il-proġett mhux se jintemm mal-ġurnata tal-elezzjoni. Din hi viżjoni għal pajjiżna. Biex jgħix dan il-moviment, dan irid jibqa’ użat mill-partit.”

Spjega li “għamilna għażla f’din il-konferenza favur ħelsien ta’ għada. Li nkunu l-aq­wa fl-Ewropa. Għandna l-isfida tal-2017, meta Malta jkollha l-Presidenza tal-UE. Din mhux sfida ta’ gvern imma sfi­da ta’ poplu. Mhix se tkun sfida ta’ nofs pop­lu. Biex nilqgħu għal din l-isfida, ma nis­tgħux inkunu kuntenti bil-medjokrità. Ir­ri­du niffokaw biex nagħtu tmexxija lill-Ew­ro­pa, biex nuru li l-iżgħar pajjiż kapaċi daqs l-akbar pajjiż tal-UE. Irridu nuru rieda enormi biex turi li l-poplu hu akbar mid-daqs tagħna. Għalhekk il-PL qed jagħ­żel it-triq ta’ moviment. Nistieden lil kul­ħadd biex jingħaqad magħna f’dan il-movi­ment jekk temmenu li għada jisbaħ jum aħ­jar. L-aħjar snin għal pajjiżna għadhom ġej­jin”.

victorvella2002@yahoo.com