Il-Kap tad-Dipartiment tal-Arkitettura, il-Professur Dennis de Lucca, qal li mill-istudenti huwa mistenni li fil-proġetti tagħhom joħorġu b’argumenti u soluzzjonijiet dwar il-proġett propost f’Ħondoq ir-Rummien f’Għawdex u dwar kif Triq ir-Repubblika fil-Belt Valletta tista’ tkun aċċessibli għal persuni b’diżabilità. Dan iwassal biex il-ġenerazzjonijiet ta’ warajna jgawdu ambjent aħjar u min-naħa l-oħra jiskopru kif postijiet storiċi jkunu aċċessibli għal persuni b’diżabilità mingħajr ma ssirilhom ħsara strutturali.

Min-naħa tagħha Astrid Vella f’isem l-għaqda Flimkien għal Ambjent Aħjar qalet li tinsab kuntenta ħafna li ġiet imnedija din l-inizjattiva, għax se tgħin lill-istudenti għal meta jidħlu fid-dinja tax-xogħol.

Iċ-Ċermen tal-Kummissjoni Nazzjonali Persuni b’Diżabilità Joe Camilleri qal li huwa importanti li f’dan il-kuntest isir emfasi li l-persuni b’diżabilità jinkludu ukoll lill-anzjani u lil nies mingħajr dawl fost l-oħrajn. Camilleri qal li f’Malta ma għandniex ambjent attrezzat għal persuni b’diżabilità biex dawn ikunu jistgħu jgawdu l-ħajja bħal ħaddieħor. Hu sostna li pajjiżi bħal Spanja ħadmu ħafna f’dan ir-rigward u għaldaqstant qiegħed jirnexxilhom jattiraw lejn pajjiżhom anzjani u persuni b’diżabilità.

Min-naħa tiegħu f’kumment li ta lil dan il-ġurnal, Pawlu Buttigieg f’isem Ħarsien Ħondoq qal li b’din l-inizjattiva “urejna lill-poplu Malti li għandna fiduċja fl-istudenti tal-arkitettura, u b’hekk nuru li dan il-post se jibqa’ jitgawda minn kulħadd”. Buttigieg sostna li l-proġetti tal-istudenti se jkunu għal wiri tal-pubbliku fl-iskola primarja tal-Qala.

L-istudenti li jirbħu t-titlu għall-aqwa proġett fis-suġġett rispettiv tagħhom se jingħataw is-somma ta’ €700.

cformosa@unionprint.com.mt