Il-Gvern Kolonjali ta’ dak iż-żmien irreaġixxa billi niżżel fit-toroq lill-Pulizija armati bil-lembubi u t-tarek u lill-Commandos ta’ l-Armata Ingliża. Dimostranti Maltin issawtu bla ħniena mill-Pulizija. Inqasmu l-lembubi fuq l-irjus. Xtered id-demm. Inħarqu Għases tal-Pulizija wara li għal dak il-jum it-toroq spiċċaw f’idejn il-poplu.

Il-GWU illum qed tfakkar dan il-jum għażiż fl-istorja tagħha. Fost l-attivitajiet tal-lum, fl-4.00 ta’ wara nofs in-nhar se ssir laqgħa speċjali tal-Kunsill Nazzjonali tal-GWU fit-Telgħa ta’ Raħal Ġdid, biswit il-Paola Wolves, biex jitfakkar l-Istrajk Ġenerali ta’ 50 sena ilu. F’dan l-istess post, fit-28 ta’ April, 1958, seħħew l-eqqel konfronti bejn il-ħaddiema u l-Pulizija.

Fost dawk mistednin għal din il-laqgħa speċjali tal-Kunsill Nazzjonali tal-GWU hemm dawk kollha li ħadu sehem fl-Istrajk Ġenerali.

Paġni 4, 5, 6 u 7 huma ddedikati għal tifkira ta’ dan il-jum glorjuż u fihom insibu rakkonti, intervisti u kummenti b’konnessjoni mal-Jum tat-28 ta’ April, 1958. Dwar dan il-jum huwa wkoll il-Kumment Editorjali f’paġna 8.