|
|
Il-Maltin iridu lill-UE tisħaq
aktar fuq l-immigrazzjoni |
|
Fl-aħħar ġimgħat u xhur smajna ħafna dikjarazzjonijiet minn diversi esponenti ta’ l-Unjoni Ewropea dwar il-bżonn li Malta tkun mgħejjuna fuq il-problema ta’ l-immigrazzjoni illegali. Kien hemm diversi li ssimpatizzaw mal-problemi li qiegħda tiffaċċja Malta f’dan ir-rigward. Fl-aħħar jiem ukoll il-Viċi President tal-Kummissjoni Ewropea, Franco Frattini, waqt żjara f’Malta qal li “llum l-Unjoni Ewropea hi aktar konxja tal-problemi ta’ Malta”. Malta riedet li l-pajjiżi Ewropej jerfgħu ftit mill-problema tal-pajjiż billi jieħdu immigranti minn Malta, proposta li ntlaqgħet biss minn ħames pajjiżi Ewropej, bil-biċċa l-kbira jagħżlu li ma jiħdux immigranti minn Malta. Intant is-sitwazzjoni reali hi dik li din is-sena kompliet il-mewġa ta’ immigranti illegali li jidħlu f’pajjiżna, għalkemm id-destinazzjoni tagħhom tkun l-Ewropa u mhux Malta. Din is-sena diġŕ daħlu aktar minn 1,000 immigrant, fatt li qiegħed joħloq iffollar fiċ-ċentri ta’ detenzjoni.
|
Quddiem dan kollu l-mistoqsija li ssir hi x’iridu l-Maltin mill-UE fuq l-immigrazzjoni? Din il-mistoqsija titwieġeb b’mod ċar mill-istħarriġ ta’ l-Ewrobarometru. Fil-fatt, l-aktar riżultati popolari fost il-Maltin għal dak li jaħsbu li l-Unjoni Ewropea għandha tisħaq l-aktar biex tinbena unjoni, aktar hemm il-kwistjoni ta’ l-immigrazzjoni illegali b’persentaġġ ta’ 38 fil-mija. Wara jiġu l-enerġija bi 33 fil-mija, suġġetti ambjentali b’31 fil-mija u l-ġlieda kontra l-kriminalitŕ b’27 fil-mija.
Mill-istħarriġ ta’ l-Ewrobarometru jirriżulta wkoll li l-akbar persentaġġi għall-Maltin ta’ dawk li qalu li d-deċiżjonijiet għal Malta għandhom jittieħdu flimkien ma’ l-Unjoni Ewropea, huma dwar is-suġġetti tal-ġlieda kontra t-terroriżmu bi 89 fil-mija, xjenza u teknoloġija b’85 fil-mija, reġuni li għaddejjin minn diffikultajiet ekonomiċi bi 84 fil-mija, difiża u affarijiet barranin b’81 fil-mija u l-immigrazzjoni b’79 fil-mija.
Il-Maltin u l-Unjoni Ewropea
Intant l-istħarriġ ta’ l-Ewrobarometru jistħarreġ fuq l-immaġini ta’ l-Unjoni Ewropea mal-Maltin u naraw li 51 fil-mija jgħidu li huma favur is-sħubija ta’ Malta fl-Unjoni Ewropea. 66 fil-mija jaħsbu li Malta bbenefikat minħabba li saret parti mill-UE. 23 fil-mija jaħsbu li ma bbenefikatx u 11 fil-mija qalu li ma jafux.
Fiduċja fl-istituzzjonijiet Ewropej
Il-Maltin ġew mistoqsijin biex jagħtu l-opinjoni tagħhom dwar il-fiduċja fl-istituzzjonijiet ta’ l-Unjoni Ewropea. Il-maġġoranza assoluta għandhom fiduċja fil-Parlament Ewropew, fil-Kummissjoni Ewropea, fil-Kunsill ta’ l-UE u fil-Bank Ċentrali Ewropew. L-akbar fiduċja tal-Maltin hi fil-Parlament Ewropew u fil-Kummissjoni Ewropea b’68 fil-mija.
Malta u s-sħubija fl-UE
Għal diversi suġġetti l-Maltin jaqblu li Malta tinsab aħjar minħabba fis-sħubija ta’ l-Unjoni Ewropea. Infatti 62 fil-mija jaqblu li l-Maltin huma aktar siguri minħabba s-sħubija u 56 jaqblu li qegħdin aktar stabbli ekonomikament minħabba l-Unjoni Ewropea. Min-naħa l-oħra, 72 fil-mija tal-Maltin ma jħossux li huma involuti fl-affarijiet ta’ l-Unjoni Ewropea u 75 fil-mija jaħsbu li l-pajjiżi l-kbar huma aktar b’saħħithom fl-UE.
victorvella2002@yahoo.com
|
|
Artikli oħrajn fis-sezzjoni Aħbarijiet
|
|
|
|
|
