Waqt li kien qieghed jindirizza l-Kumitat dwar l-Affarijiet Politici, is-Sigurtà u d-Drittijiet Umani ta’ l-Assemblea Parlamentari tal-Process Ewro-Mediterranju, il-Kelliem Ewlieni Laburista ghall-Affarijiet Ewropej George Vella talab lill-UE biex taghti hafna iktar ghajnuna u attenzjoni lil Malta fejn tidhol il-kwistjoni ta’ l-immigrazzjoni illegali.

It-Tabib Vella spjega kif ghad-daqs zghir Malta ghandha densità qawwija ta‘ popolazzjoni u aktar ma jidhlu immigranti illegali aktar tikber din il-problema. Ghalhekk iz-zieda fl-immigranti illegali li qeghdin jaslu f’Malta qieghda tkun ta’ piz kbir fuq ir-rizorsi finanzjarji u umani ta’ pajjizna, l-iktar fejn jidhlu l-Pulizija u l-Armata.

Aghar minn hekk, zied it-Tabib Vella, din is-sitwazzjoni qieghda tohloq diffikultajiet biex pajjizna jassigura d-drittijiet umani ta’ l-istess immigranti illegali u jgorr l-obbligi tal-konvenzjonijiet u t-trattati internazzjonali, l-iktar f’dawk li huma direttivi dwar zmien ta’ detenzjoni u integrazzjoni.

Huwa semma wkoll kif in-nuqqas ta’ dokumenti fuq l-immigranti, in-nuqqas ta’ ftehim internazzjonali u l-hin biex tkun ivverifikata kull talba ghall-azil qeghdin iwasslu biex in-numru ta’ immigranti jkompli jizdied u fl-istess hin pajjizna jrid jipprovdilhom centri miftuhin u servizzi ohrajn bhall-edukazzjoni u s-sahha.

“Sfortunatament is-sitwazzjoni qieghda taghti nifs lil gruppi tal-lemin esterem li qeghdin irewwhu sentimenti razzisti u xenofobici li sal-lum bl-ebda mod ma kienu jifformaw parti mill-karattru ospitabbli tal-Maltin u l-Ghawdxin”.

Waqt li sahaq li l-poplu Malti jistenna iktar mizuri minn naha ta’ l-UE, u li dawn ikunu wkoll immedjati, George Vella talab lid-Direttur Generali tal-Kummissjoni Ewropea dwar ir-Relazzjonijiet Barranin Eneko Landaburu biex iwassal lill-UE t-thassib tal-poplu Malti u Ghawdxi.